O vindeiro 7 de marzo, sábado, convocámosvos a unha xornada de voluntariado ambiental para eliminar eucaliptos nas fincas que a Fundación Eira custodia en Ramil, Agolada. Polos nosos bosques autóctonos, nin un eucalipto sen cortar!
A xornada, en horario de 16 a 18h, enmárcase na campaña “Cousa de Raíces” en defensa dos nosos bosques autóctonos.
O domingo 15 de marzo, ADEGA-Lugo realizará un novo roteiro “Cousa de Raíces” pola Serra dos Ancares para exaltar dous tipos de bosque reliquia da nosa paisaxe: os acebais ou aciveirais e as reboleiras. O programa de roteiros “Cousa de Raíces” trata de poñer en valor as especies e formacións boscosas propias do noso territorio, dentro da campaña que leva o mesmo nome e na que participan máis de 50 colectivos e entidades con ese obxectivo común.
O roteiro será de 12 quilómetros de lonxitude e de dificultade media.
A Comunidade de Montes de Peiteiros de Gondomar quere repoboar con castiñeiros o Lombo do Roxás e convida a todos os comuneiros e veciños a participar desta actividade que terá lugar o vindeiro sábado. É unha iniciativa que desenvolve esta comunidade de montes por terceiro ano consecutivo para recuperar o espazo como bosque autóctono, eliminando piñeiro, eucalipto e acacia da zona comprendida entre Lombo do Roxás e Curro Vello. O punto de encontro da actividade terá lugar o sábado 28 de febreiro na área de recreo do Lombo de Roxás ás 10 horas. Esta é unha nova extraída de La Voz de Galicia. Seguir lendo 
Dentro da campaña “Cousa de Raíces” ADEGA vén de denunciar outra plantación de eucaliptos sobre un antigo bosque atlántico na ZEC (LIC) Xubia-Castro, parte da Rede Natura 2000.
Fragas do Eume, Xistral, A Mariña, Careón, Macizo Central, Courel… os monocultivos de pirófitas, nomeadamente de eucalipto avanzan mesmo no interior destes espazos protexidos.
Malia á recente aprobación do Plano Director da RN2000, determinadas actividades que comprometen a conservación do patrimonio natural destes valiosos espazos, quer as talas de bosque e mato autóctono para substituilo por plantacións de eucaliptos, seguen a acontecer con case total impunidade.
O último caso, que non o derradeiro, vén de acontecer na ZEC (Zona de Especial Conservación) Xubia-Castro, nos concellos de San Sadurniño e As Somozas. Unha plantación de eucaliptos de 20 hectáreas dentro do espazo protexido vén de substituir a un bosque caducifolio de ladeira e ao bosque de ribeira do fondo do val, hábitat este último considerado de conservación prioritaria pola Directiva 92/43CEE. É unha información de ADEGA.
ADEGA e MariñaPatrimonio pídenlle ao Servizo de Patrimonio Cultural da Xunta de Galicia que paralice de inmediato a plantación de eucaliptos que está a prexudicar os valores patrimoniais dun xacemento mineiro da época romana de Riotorto e, ao mesmo tempo, solicita a súa inclusión no Inventario Xeral de Bens Patrimoniais de Galicia.
O vindeiro domingo 22 de febreiro, ADEGA realizará un novo roteiro “Cousa de Raíces” para exaltar os valores do bosque ribeira. O traxecto discorrerá polas ribeiras dos ríos Sarria e Celeiro e estaremos acompañados pola Plataforma Sarriana polo río. Este será o segundo roteiro do programa “Cousa de Raíces” a prol dos bosques galegos. O programa de roteiros 2015, titulado “Cousa de Raíces”, que ADEGA-Lugo impulsa este ano, pretende achegar as persoas participantes a algúns dos bosques máis emblemáticos do País, pero sobre todo, a lugares que representen a enorme variedade de floresta autóctona coa que contamos, pese a que nas últimas décadas está fortemente ameazada e en regresión.
Seguir lendo
Cousa de Raíces 