Máis de 20 experiencias demostran que o monte galego é algo máis que eucalipto

A ONU proclamou o 22 de maio Día Internacional da Diversidade Biolóxica, para subliñar a importancia de conservar este patrimonio. Este ano o lema é “Biodiversidade para o desenvolvemento sustentábel”.

Unha manchea de colectivos sociais adscritos a esta campaña “Cousa de Raíces” queremos amosar as nosas experiencias para criar riqueza e dinamizar o rural, fuxindo dos monocultivos e o abandono que promoven algunhas institucións.

Na publicación “Experiencias sostibles no monte galego” damos conta de 22 iniciativas que se están a desenvolver en Galiza baseadas na aposta polas especies forestais autóctonas, na diversifiación das producións, na recuperación de terras de cultivo e razas galegas, no aproveitamento dos froitos do bosque, etc.

O documento estará dispoñible a partires de hoxe nesta web en formato dixital e será totalmente accesible.

Roteiro polo bosque de inundación do LIC Ladra-Parga-Támoga

O roteiro polo bosque de inundación de Begonte, do vindeiro 31 de maio, será un dos últimos roteiros que ADEGA-Lugo realizará dentro do programa de roteiros 2015, “Cousa de Raíces” e a través do cal se pretendou dar a coñecer as distintas tipoloxías dos bosques galegos. Desta volta, propoñemos que coñezas o bosque de inundación nunha das paraxes máis fermosas da provincia de Lugo que, ademais de ser Reserva da Biosfera, tamén é Lugar de Interese Comunitario e Rede Natura. Trátase do LIC Ladra-Parga-Támoga.

Colabora na realización deste roteiro a Casa das Insuas de Rábade.

O Ministerio autoriza a fumigación masiva dos eucaliptos cun tóxico para as abellas

Fumigacións masivas na Coruña, Pontevedra e distritos VI e XI

ADEGA vén de advertir sobre os perigos da fumigación masiva de eucaliptais na Coruña, Pontevedra, O Ribeiro e A Mariña contra o gorgullo do eucalipto, a través dun principio activo chamado taufluvalinato. Este composto é moi perigoso para as abellas e esténdese facilmente polos medios acuáticos. Unha aplicación masiva deste inseticida pode xerar un grave impacto no territorio e na nosa saúde. Aínda así, o Ministerio vén de autorizar, á petición da Xunta e da patronal pasteira, a propietarios e arrendatarios de terreos forestais a usar este perigoso tóxico nas súas plantacións de eucaliptos ata o vindeiro 6 de xaneiro como data límite. Ecoloxistas e apiclutores piden á cidadanía a que denuncie esta situación, polo ben de todas e todos, e que estea atenta a posibles incumprimentos das condicións de fumigación.

Montenoso estrea web e participa no curso sobre a re-invención dos comúns

Montenoso participará no curso de verán A Reinvención dos Comúns, que terá lugar o 18 e 19 de xuño na USC e que conta na co-organización coas comunidades Proxecto Derriba, Alg-a laboratório e Ergosfera. E o próximo sábado 16 de maio presenta a súa nova web, cun mellor sistema de visualización da información, así como a nova versión da cartografía do mancomún, impulsada dende o voluntarismo do comisión de traballo de TICS do colectivo montenoso.

Fragas do Mandeo custodiará durante 50 anos un bosque municipal de Coirós

Onte a Fundación Fragas do Mandeo asinou un convenio co Concello de Coirós para xestionar durante 50 anos a conservación de 92.239 m² de bosque de titularidade municipal no entorno do monte da Espenuca. Deste xeito, pasarán a duplicar a extensión que xa están a custodiar actualmente. Un terzo da superficie son parcelas situadas na beira do río. A multitude de especies arbóreas que medran nas proximidades da auga conforman un bosque de ribeira considerado hábitat prioritario. Segundo nos afastamos do río ladeira arriba, van dominando os carballos, constituíndo un bosque denominado carballeira galaico-portuguesa. Continúa a ler o comunicado da Fundación…